بەپێی ڕاگەیاندنی بەشی پەیوەندییە گشتییەکانی زانکۆی کوردستان، بە دەرچوونی فەرمانێک لەلایەن دکتۆر عادل سی و سێ مردە، سەرۆکی زانکۆی کوردستانەوە، دکتۆر بەختیار جەواهیری بە پۆستی «ڕاگری کۆلێژی زانستە مرۆیی و کۆمەڵایەتییەکان» دامەزرا.
لەم فەرمانەدا کە لە ڕێکەوتی ٤ی سەرماوەزی ١٤٠٤ەوە کاری پێ دەکرێت، دامەزراندنەکە لەسەر بنەمای توانا، دڵسۆزی، زانست و ئەزموونە بەنرخەکانی ناوبراو بووە. دکتۆر جەواهیری ئەم بەرپرسیارێتییە هاوکات لەگەڵ پاراستنی ئەرکە فێرکاری و توێژینەوەییەکانی خۆی بەڕێوە دەبات.

سەرۆکی زانکۆ لەم فەرمانەدا هیوای خواستووە کە دکتۆر جەواهیری بە ڕاکێشانی هاوکاریی ئەندامانی دەستەی زانستی و فەرمانبەران و بە بایەخدانێکی جددی بە هاوئاهەنگی و هاودڵی، هەنگاو بنێت بەرەو بەدیهێنانی ئامانجە سەرەکییەکانی کۆلێژ. بەرزکردنەوەی چەندایەتی و چۆنایەتیی چالاکییە فێرکاری و توێژینەوەییەکان، پەرەپێدانی تەکنەلۆژیا، گێڕانی ڕۆڵێکی کاریگەر لە بواری بەرپرسیارێتیی کۆمەڵایەتیدا و پێشخستنی گەشەی هەمەلایەنەی کۆلێژ، لە گرنگترین ئەو تەوەرانەن کە لەم فەرمانەدا جەختیان لەسەر کراوەتەوە.